النديم ينشر شهادة شقيق مجند قتل على أيدي الشرطة في قليوب

النديم ينشر شهادة شقيق مجند قتل على أيدي الشرطة في قليوب.. كريم مات خلاص بس فيه غيره هايخش القسم ده 

المجند هو كريم بيومي يوسف. كريم يعمل في القاهرة. أسرته تسكن في قرية كوم أشفين بعد قليوب بمحطة. معه ابتدائية. مجند حربية للسنة الثالثة وموعد خروجه مارس 2013. كان يعمل مع شقيقه في محله لبيع اكسسوارات السيارات. والده متوفي منذ كان كريم في العاشرة من عمره. شقيقه اسمه شادي. يقول شادي:

يوم الخميس:

يوم 20 سبتمبر كريم كان معدي وهو رايح مكتب الشغل بتاعه (كان راكب ماكينة) لقى فيه خناقة في الشارع ومن ضمن الواقفين كان فيه ابن عمه صغير في السن.. ضربه وقال له روّح (ابن العم عمره 16 سنة). جاي يمشي مخبر مسكه من هدومه. "أنا مليش دعوة أنا مجند ورايح وحدتي" "مليش فيه" "الكارنيه بتاعي أهو" "مليش فيه".

وجت قوة من القسم أخدت كريم وأخدت مجموعة من الناس في بوكس وراحوا على قسم قليوب. ناس اتصلت بينا وقالوا أن الشرطة أخدوا كريم، روحنا وقفنا قدام القسم محدش عايز يدينا عقاد نافع.. أنكروا إن كريم جوا.. والدتي راحت تتوسل لأمين الشرطة قال لها امشي بدل ما أمد ايدي عليكي.

يوم الجمعة الصبح:

فوجئنا بعربية شرطة عسكرية جاية القسم. فكرت إنهم جايين لكريم. سألت قالوا لأ، لأ جايين لمشكلة تانية. قلت له فين كريم. قالوا احنا معندناش معلومات خالص. في القسم كمان أنكروه مرتين، وفي المرة الثالثة عسكري الشرطة العسكرية أخد مني بيانات كريم.. برضه أنكروه. طلب منهم المحاضر واطلع عليها بنفسه، لقى كريم في أول محضر. المأمور رفض يسلم الشرطة العسكرية كريم، واختلفوا.

يوم الجمعة بالليل:

قالوا فيه عرض على النيابة. شوفنا كريم والشرطة العسكرية راحت معاه. دخلوا المحاضر من غير الأشخاص. الشرطة العسكرية ألحت إن وكيل النيابة يشوف حالة كريم. أول ما دخل وكيل النيابة صعق لما شافه وقال عرض باكر. شكل كريم، كان عينه الشمال وارمة وزرقان تحت العين وجروح بالجبهة والوجه والرقبة والصدر والكتف: كدمات حمراء على زرقاء (كله مش بقع). كان صعبان عليه نفسه.. مش عايز يورينا نفسه.

يوم السبت الصبح

رحنا النيابة الصبح. حضر معاه محامي احنا اللي جايبينه. كانوا عايزين يرجعوه القسم والشرطة العسكرية أصرت إنهم ياخدوه، وأخدوه. وكيل النيابة أمر بعرضه على طبيب في مستشفى بولاق العام ثاني يوم. واداله 4 أيام على ذمة التحقيق. مش عارف ليه ماعرضوش في نفس اليوم. يوم السبت عرفنا من كريم: إن ضابط المباحث كسر له الكارنيه وشتمه أول ما دخل القسم ودفعه على الأرض ووقف عليه بالجزمة فوق رقبته. كل ده عشان قال له: "أنا مينفعش تاخدني.. أنا عسكري". معاون المباحث أحمد عبد العال هو اللي ضرب كريم في الشارع والقسم، هو ورقيب الشرطة محمد الشحات رجب، وعريف شرطة محمد عبد الباقي عبد الباقي. عملنا محضر في النيابة يوم السبت باللي حصل لكريم في القسم على إيد رئيس المباحث والمخبرين وناس كريم عارفهم شكلاً. المحضر بإسم والدتي لواحظ سليمان علي عبد الدايم.

يوم الأحد:

الشرطة العسكرية جاية بكريم وجواب رسمي من الجيش لقينا شبه كوردون في المستشفى. والدكتور عمل تقرير ظاهري فقط (مناخيره كانت بتنزف دم، وبقعة دم في العين وحاسس إنه مش شايف، ضربة طبنجة عاملة إصابة في دماغه من الضهر).. كريم كان عايز يعمل آشعات على الحاجات دي كلها وكان بيعيط. الدكتور رفض وقال التعليمات بتقول اعمل ظاهري فقط. خرجنا من عند الدكتور.. المأمور بعت اتنين أمناء شرطة ياخدوا التقرير.. ورفضوا يدوا نسخة للشرطة العسكرية وقالوا تروحوا القسم تاخدوا صورة طبق الأصل.. لما راحوا القسم لقوا الموظفين مشيوا.

يوم الاثنين:

كريم طالع يجدد أمام قاضي التحقيق، جدد له 15 يوم. القسم جاي بالتقرير وبرضه رفضوا إن الشرطة العسكرية تطلع أو تاخد صورة. وقالوا روحوا القسم، ونفس الحكاية ما أخدوش حاجة. "استخدام القوة والعنف مع موظفين عموميين وتهريب متهم". فيه تعتيم معمول على كريم مش عارف ليه.

كريم حالياً مع الشرطة العسكرية على ذمة القضية. الواقعة حصلت في مكان شغل كريم. الدنيا كلها بتحب كريم.. 3 سنوات في الجيش لا جزاء ولا أي حاجة. يوم الجلسة، ضابط المباحث بيقول عملنا تحريات لقينا كريم الدنيا كلها بتحبه.

كريم اتسأل كمتهم وكمجني عليه.. مكتوب في التحقيق إن وكيل النيابة سأله هل ترغب في عرضك على الطب الشرعي وإن كريم جاوب بلأ. ما أخدوش أقوال الشهود.

كريم مات خلاص.. فيه غيره هيخش القسم ده.. مفيش حد بيحط كلمة حلوة في القسم ده. احنا قلنا البلد اتعدلت وكل واحد هياخد حقه بالقانون.